साइबरसंसारका सञ्चालक दाजुभाइ पक्राउ

कान्तिपुर संवाददाता

काठमाडौं, भाद्र ३० - फिल्म डाउनलोड गरी अवैद्य कारोबार गरेको आरोपमा प्रहरीले साइबरसंसार डटकमका सञ्चालकद्वय अभिनव कसजु र दिपङ्कर कसजुलाई पक्राउ गरेको छ ।

टेकुस्थित साइबरसंसारको कार्यालयमा साँझ सवा ६ बजे छापा मारेर सञ्चालकद्वयलाई पक्राउ गरिएको महानगरीय प्रहरी परिसर काठमाडौंका प्रबक्ता केदार ढकालले जानकारी दिए । उनीहरुले प्रतिलिपी अधिकारको दुरुपयोग गरी फिल्मको अवैद्य व्यापार गरेको सुराकीको आधारमा पक्राउ गरिएको उनले बताए ।

अभिनव र दिपङ्करले प्रतिलिपी अधिकार नलिई गीभमीएचडी डट कममा सदस्य बनाएर लाखौं रुपैयाँ असुल्ने गरेको आरोप प्रहरीले लगाएको छ । 'नेपाल डब्लुटीओको सदस्य राष्ट्र भएकाले उनीहरुलाई 'पाइरेसी' अन्तर्गत कारबाही हुन सक्छ,' ढकालले बुधबार साँझ ईकान्तिपुरसित भने ।