उपत्यकाका दसवटा क्याम्पसका प्रमुखहरुले सामूहिक राजीनामा दिए

काठमाडौ,१ भाद्र (दैनिकी)

विश्वविद्यालयले शुल्क सम्बन्धी ठोस निर्णय नगरेसम्म काम गर्ने वातावरण नभएको भन्दै उपत्यकाका दसवटा क्याम्पसका प्रमुखहरुले सामूहिक राजीनामा दिएका छन् । उनीहरुले सोमबार राजीनामा दिएका हुन् । क्याम्पस प्रमुखहरुले त्रिभुवन विश्वविद्यालयका उपकुलपतिलाई राजीनामा पत्र बुझाएका हुन् । विद्यार्थी संगठनहरुबाट क्याम्पस प्रमुखको कार्यालय र लेखाशाखा तालबन्दी, दैनिक घेराउ, गाली, वेइजती, र अभद्र व्यवहारको कारण कार्य सम्पादन गर्न असहज वातावरण भएकोले राजीनामा दिएको पत्रमा उल्लेख छ ।
राजीनामा दिने क्याम्पस प्रमुखहरुमा रत्नराज्यलक्ष्मीका गोपालचन्द्र पोखरेल, शङ्करदेव क्याम्पसका कमलदीप ढकाल, महेन्द्ररत्न क्याम्पसका नेत्रप्रसाद धिताल, नेपाल कमर्स क्याम्पसका दीवाकर पोखरेल, अमृत साइन्स क्याम्पसका नारायण खड्का छन् । यसैगरी पद्मकन्या क्याम्पसकी इरेन श्रेष्ठ, पब्लिक युथ क्याम्पसकी गीता मल्ल, सरस्वती बहुमुखी क्याम्पसकी राज्यलक्ष्मी खड्का, भक्तपुर क्याम्पसका शंकर उपाध्याय र सानोठिमी क्याम्पसका जगतकृष्ण पोखरेलले पनि राजीनामा दिनु भएको छ ।