घरेलु बालमजदुरको रहस्यमय मृत्यु

घरेलु कामदारका रुपमा दुरुपयोग भएका बालबालिकाहरुले चर्को यातना पाउने गरेका घटनाहरु सार्वजनिक भईरहेका बेला बुटवलमा एक डाक्टरको घरमा काम गर्ने बालकको रहस्यमय तरिकाबाट मृत्यु भएको छ ।




बुटवलको लुम्बिनी अञ्चल अस्पतालका सर्जन डाक्टर रमेशमान सिंहको घरमा काम गर्ने १४ बर्षीय बालक सुबास चौधरी डाक्टरकै घरमा हिजो सांझपख मृत अवस्थामा फेला परेका हुन । डाक्टर परिवारले बालकले झुण्डिएर आत्महत्या गरेको जिकिर गरेका छन् । तर बालकका आफन्त र डाक्टरका छिमेकीहरुले भने सुवासको यातनाबाट मृत्यु भएको दावी गर्दै कडा कारबाहीको माग गरेका छन् । मृतक बालककी आमा विष्णु चौधरीले यसअघि पनि डाक्टर परिवारले आफ्नो छोरालाई चर्को यातना दिएको बतााउदै यातनाबाटै छोराको मृत्यु भएको दावी गरिन । उनले छोरालाई डाक्टर परिवारले पहिले बाहिर निस्कन र आफूहरुसंग भेट्न समेत नदिने गरेको अहिले यातनाबाटै मारेको बताउँदै न्यायकालागि सहयोग गर्न आग्रह गरिन ।



रुपन्देहीको आनन्दवन गाबिस- १२ का सुवास विगत एक बर्षदेखि डा.सिंहको घरमा काम गर्दै आएका थिए । उनी बुटवलको सिद्धेश्वरी माविमा कक्षा ४ मा पढ्दथे ।



ईलाका प्रहरी कार्यलय बुटवललका डिएसपी दानबहादुर कार्कीले घटनाको प्रकृति हेर्दा बालकले आत्महत्या गरेको देखिएपनि थप अनुसन्धान जारी रहेको बताए । प्रहरीले डा.सिंहलाई पक्राउ गरी अनुसन्धान गरिरहेको जनाएको छ ।