सेमिफाइनल खेलमा नेपाल मलेसियासँग भिड्दै

काठमाडौं, २५ चैत (दैनिकी)

एसियाली क्रिकेट परिषद् (एसीसी) ट्रफी एलिट कप–२०१० क्रिकेट प्रतियोगिता अन्तर्गत आज नेपालले सेमिफाइनल खेलमा समूह बी को उपविजेता मलेसियासँग प्रतिस्पर्धा गर्दैछ। यस अघि मंगलबार भएको खेलमा नेपालले कुवेतलाई ८ विकेटले हराउँदै समूह ए को विजेता बनेको छ। आयोजक राष्ट्र कुवेतको हुवारा क्रिकेट मैदानमा हिजो सम्पन्न खेलमा कुवेतलाई पराजित गर्दै नेपालले ८ अङ्क बनाएको छ। खेलमा टस जितेर पहिला बलिङ गर्ने निर्णय गरेको नेपालले कुवेतलाई ४२ ओभरमा १२० रनमा सीमित पारेको थियो।
कुवेतलाई झिनो रनमा समेट्ने क्रममा नेपालका सञ्जम रेग्मीले सर्वाधिक ४ विकेट लिन सफल भए। त्यस्तै राष्ट्रिय टोलीका पूर्वकप्तान विनोद दासले ३, मेहबुब आलमले २ र टोली कप्तान पारस खड्काले एक विकेट लिएका थिए। नेपालले १२१ रनको खिरिलो विजय लक्ष्य २६.४ ओभरमा २ विकेट खर्चिदै भेट्टाएको थियो। नेपालका लागि ब्याटिङतर्फ महेश क्षेत्रीले ६३ रनको अर्धसतकको योगदान गरेका थिए भने अनिल मण्डलले ३३ र शक्ति गौचनले १३ रन बनाएका थिए।