प्राधिकरणले तालिका विपरीत मनोमानी ढङ्गले लाइन काट्ने

भद्रपुर, १७ चैत (दैनिकी)

नेपाल विद्युत् प्राधिकरणले जारी गरेको लोडसेडिङ तालिका विपरीत मनोमानी ढङ्गले लाइन काट्ने गरेकाले भद्रपुर क्षेत्रका विद्युत् उपभोक्ता मर्कामा पर्न थालेका छन् । विगत एकसातादेखि नियमितरूपमा मध्याहृन १२ देखि ४, राति ८ देखि १२ र बिहान ४ देखि ८ बजेसम्म लाइन काट्ने गरेको छ । सो कारणले कार्यालयको कामकाज प्रभावित भइरहेको र प्रवेशिकाका साथै अन्य कक्षाको पनि जाँच चलिरहेकाले पढाइमा अप्ठेरो परेको परीक्षार्थीको गुनासो छ ।
यसअघि प्रत्येक दिन लोडसेडिङको तालिकामा चक्रप्रणालीको आधारमा समय निर्धारण गरिएको थियो । यस सम्बन्धमा भद्रपुरस्थित विद्युत् प्राधिकरण प्रमुख मोहम्मदआफताव आलमले केही बताउनु चाहनु भएन ।