उच्चस्तरीय संयन्त्रको संयोजकको विषयमा विवाद नगर्ने

संयन्त्रका संयोजक गिरिजाप्रसाद कोइरालाको निधनपछि बसेको यो पहिलो बैठक

काठमाडौं, १३ चैत (दैनिकी)

उच्चस्तरीय राजनीतिक संयन्त्रको शुक्रबारको बैठकमा शान्तिप्रक्रिया, संविधान लेखन, राज्य पुनःसंरचना आयोग गठन लगायत विषयमा छलफल भएको छ । एकीकृत नेकपा (माओवादी)का अध्यक्ष पुष्पकमल दाहाल 'प्रचण्ड'को अध्यक्षतामा भएको बैठकमा संयन्त्रको संयोजकको विषयमा विवाद नगर्ने र त्यो आपसी सहमतिमा तय गरिने नेकपा एमालेका अध्यक्ष झलनाथ खनालले बताउनुभयो । राज्य पुनःसंरचना आयोग गठन गर्नेबारेमा तीन दलबीच सहमति भइसकेको बताउँदै उहाँले त्यस सम्बन्धमा संविधानसभामा प्रतिनिधित्व गर्ने २५ दलको सहमति लिने प्रयास भइरहेको जानकारी दिनुभयो ।
सौहार्द्रपूर्ण वातावरणमा भएको बैठकमा माओवादी अध्यक्ष प्रचण्डले संयन्त्रका संयोजक स्वर्गीय गिरिजाप्रसाद कोइरालाको निधनप्रति शोकप्रस्ताव प्रस्तुत गर्नेबाहेक अन्य विषयवस्तु समावेश नगरिएको जानकारी दिनुभयो । नेपाली काङ्ग्रेसका संसदीय दलका नेता एवम् उपसभापति रामचन्द्र पौडेलले संयन्त्रको संयोजक दलहरुबीचको परामर्शबाट टुङ्गो लगाउने बताउँदै त्यसमा संविधानसभाका अन्य दलहरुलाई पनि समावेश गरिने उल्लेख गर्नुभयो । यसैगरि बैठकले संयन्त्रका संयोजक एवम् नेपाली काङ्ग्रेसका सभापति गिरिजाप्रसाद कोइरालाको निधनप्रति गहिरो दुःख व्यक्त गर्दै शोकप्रस्ताव पारित गरेको छ । संयन्त्रका संयोजक गिरिजाप्रसाद कोइरालाको निधनपछि बसेको यो पहिलो बैठक हो ।