राष्ट्रपति शासन लागु हुने हल्ला मात्र

डा.यादवले जेठ १४ गते भित्र नयाँ संविधान निर्माणका लागी सहमति कायम गरेर अघि बढन दलहरुलाई आग्रह

विजेता सिंह/जनकपुर, चैत ११ गते

राष्ट्रपति डा. रामवरण यादवले स्व. गिरिजा प्रसाद कोइरालाको नेतृत्वमा रहेको उच्च स्तरीय राजनीतिक संयन्त्र सँग मुलुकले ठुलो आशा गरेको बताउनुभएको छ। कोइरालाको निधनपछि संविधान निर्माण र शान्ति प्रक्रियामा असर नपरोस भने चिन्ता लागेको पनि बताउनुभयो ।
राष्ट्रपति डा.यादवको पुख्यौली गाँउमा भेटन आउनुभएका अमेरिकी डेमोक्रेटिक पार्टीका सांसद किम फसेट, रिपब्लिकन पार्टीका साँसद केरोन क्रेसाग्रान्ट,स्टीबम व्युर्राई सहितका अमेरिकी टोली सँगको भेटघाटको क्रममा उहाँले सो कुरा बताउनुभएको हो ।
राष्ट्रपति डा.यादवको आंगनमै मंगलवार भएको अनौपचारीक भेटघाटमा उहाँले संविधान निर्माण कार्यमा भइरहेको ढिलाई प्रति चिन्ता व्यक्त गर्नुभएको छ । शान्ति प्रक्रियालाई तार्किक निष्कर्षा पुरयाउन सकेमात्र गिरिजाबावु प्रति सच्चा श्रद्धाञ्जली हुने उहाले बताउनुभयो ।
नेपालको राजनीतिक अवस्थाको अध्ययन गर्न आएका अमेरिकन टोली सँगको भेटघाटको क्रममा मुलुकको वर्तमान राजनीतिक अवस्थाको विषयमा राष्ट्रपति डा.यादवको छलफल भएको भेटघाटमा उपस्थित पूर्व उपसभामुख चित्रलेखा यादवले बताउनुभयो ।
यसअघि स्थानिय संचारकर्मी सँगको भेटघाटमा राष्ट्रपति डा.यादवले मुलुकमा राष्ट्रपति शासन लागु हुने भनि चलाइएको हल्ला गलत रहेको बताउनुभएको छ । यस्ता हल्ला किन र कसले चलाएको आफुलाई थाहा नभएको उल्लेख गर्दै राष्ट्रपति डा.यादवले यस्ता भ्रमपुर्ण कुरामा नलाग्न सवै सँग आगह गर्नुभयो ।
आरामका लागी सोमवार गृह जिल्ला धनुषाको सपहि आइपुग्नुभएको राष्ट्रपति डा.यादवले जेठ १४ गते भित्र नयाँ संविधान निर्माणका लागी सहमति कायम गरेर अघि बढन दलहरुलाई आग्रह गर्नुभयो ।