सोलार प्लानबाट सिंचाई सुविधा

प्रकाश डोटेल स्याङ्जा, २४ माघ

स्याङ्जाको जगतभज्याङ् गाउँ विकास समिति-२, पित्लेकमा करिव २ सय ६० मिटर तलबाट सोलार प्लान प्रणालीबाट पानी तानेर स्थानिय कृषकहरुले खानेपानी सहित मौसमी तथा बेमौसमी तरकारी उत्पादन गर्न थालेका छन् ।

स्थानिय जनकल्याण सहकारी संस्थाको सक्रियतामा २०६३ सालमा जगतभज्याङ् गाउँ विकास समिति ३ छरछरेबाट २ किलोमिटर टाढाबाट २ इन्चको पाईप प्रयोग गरि ल्याएको पानीलाई २ सय ६० मिटर तलबाट सोलार प्लान प्रणाली मार्फ तानेर कृषकहरुले खानेपानी र तरकारीखेतीका लागि सुविधा लिँदै आएका छन् ।

कृषकहरुले बाँकी रहेको पानीको सदुपयोग गरी मौसमी तथा बेमौसमी तरकारीखेतीबाट वाषिर्क लाखौ रकम आम्दानी गर्न सफल भएका छन् । पित्लेकमा ३२ हजार लीटर पानी अट्ने क्षमताको टयाँकी निर्माण गरिएको छ । सोलार प्लान प्रणालीबाट २४ घण्टामा १० हजार लिटर पानी तान्ने गरेको स्थानीय उपभोक्ताको भनाई छ ।

सोलार प्लान प्रणाली निर्माणका लागि कृषि तथा सहकारी मन्त्रालयको ७ लाख, जिल्ला कृषि विकास कार्यालय स्याङ्जाको ३ लाख, गाउँ विकास समितिको १ लाख ६० हजार, स्थानिय विकास कोषको १ लाख र अपुग रकम स्थानिय जनश्रमदान तथा चन्दा संकलन गरेर करिव १८ लाखको लागतमा योजना सम्पन्न भएको हो ।

योजनाको पानी प्रयोगबाट ४१ घरधुरीका मानिसहरु प्रत्यक्ष लाभान्वित भएका छन् । स्थानिय सबै कृषकले सरदर ४ रोपनी जग्गामा मौसमी तथा बेमौसमी तरकारी खेती गरेका छन् । पहाडी उच्च भुभागमा रहेको उक्त गाउँमा उत्पादीत कृषिजन्य वस्तु भारतको नौतनहवा, नेपालका बुटवल, पोखरासहित स्थानियबजार वालिङ् र स्याङ्जामा निर्यात हुदै आएको छ ।