उच्चस्तरीय संयन्त्र बैठक

काठमाडौँ, १८ माघ

उच्चस्तरीय राजनीतिक संयन्त्रको आज बसेको बैठकले यसअघि तीन दल सम्बद्ध कार्यदलले प्रस्तुत गरेको सङ्कल्प प्रस्तावको मस्यौदामाथि अझै छलफल गरी सहमतिमा पुग्ने निर्णय गरेको छ ।
नेपाली काङ्ग्रेसका सभापति गिरिजाप्रसाद कोइराला निवास महाराजगञ्जमा बसेको सो बैठकमा कार्यदलले यसअघि नै प्रस्तुत गरेको साझा सङ्कल्प प्रस्तावमा उल्लिखित सहमतिका बुँदामाथि नै छलफल भएको र त्यसबारे आगामी बिहीबार बस्ने अर्को बैठकमा अझै छलफल गरी टुङ्गोमा पुग्ने निर्णय भएको तीनै पार्टी नेताहरूले जानकारी दिए ।

नेकपा -एमाले)का अध्यक्ष झलनाथ खनालले कार्यदलले यसअघि नै प्रस्तुत गरेका बुँदामा केही विवाद भएकाले यसबारे अझै छलफल गर्न बाँकी रहेको भन्दै अर्को बैठकमा पुनः छलफल गर्ने सहमति भएको बताउनुभयो । उहाँले राज्य पुनर्संरचनासम्बन्धी आयोग निर्माणमा 'अण्डरस्ड्याण्डिङ' गरेर अघि बढ्ने सहमति भएको जानकारी दिनुभयो ।
एकीकृत नेकपा -माओवादी)का उपाध्यक्ष नारायणकाजी श्रेष्ठले आफूहरूले बैठकमा राजनीतिक गतिरोध अन्त्यका लागि राष्ट्रपतिले आफनो कदम सच्याउने गरी र्सार्वजनिक अपिल गर्नुपर्ने, राष्ट्रपतिको कदम कुनै न कुनै रूपमा सच्चिनुपर्ने या राष्ट्रपतिलाई अहिले प्राप्त अधिकारको सुरक्षा गर्दै अन्तरिम संविधानमा संशोधन गरिनुपर्ने कुरा राखेको जानकारी दिनुभयो ।
उहाँले काङ्ग्रेस र एमाले सहमतिमा आउने सकारात्मक सङ्केत पाएर नै आफ्नो पार्टी पाँचौँ चरणको आन्दोलन घोषणा नगरेको बताउँदै सञ्चारकर्मीहरूसँग भन्नुभयो-'उच्चस्तरीय संयन्त्रले सहमति निकाल्नेप्रति सकारात्मक छौँ, त्यतिञ्जेलसम्म द्वन्द्व हुनेखालका आन्दोलन गर्दैनौं, तर शान्ति, नयाँ संविधान निर्माण, राष्ट्रिय स्वाधीनता र नागरिक सवोच्चताका लागि जनपरिचालन गर्न छाड्दैनौँ ।'
नेपाली काङ्ग्रेसका प्रवक्ता अर्जुननरसिंह केसीले आजको बैठकमा पनि घुमाइफिर्राई राष्ट्रपतिको कदम सच्चिनुपर्ने आएको बताउँदै भन्नुभयो-'यसबारे बैठकमा संसदमा राष्ट्रपतिमाथि महाअभियोग लगाउनमात्र सकिन्छ, सङ्कल्प प्रस्तावमार्फ तान्न सकिँदैन भन्ने हाम्रो अडान कायम नै छ भन्यौं ।'
काङ्ग्रेस पनि राष्ट्रपतिको अधिकारक्षेत्रबारे संविधान संशोधन गर्न सकिने पक्षमा रहेको बताउँदै उहाँले साझा सङ्कल्पमाथि नै थप छलफल गरेर निष्कर्षा पुग्नुपर्छ भन्नुभयो ।
एक अर्को प्रसङ्मा सञ्चारकर्मीसँग कुरा गर्दै प्रवक्ता केसीले माओवादी र एमालेले संस्थागत प्रस्ताव ल्याए काङ्ग्रेस सरकारको नेतृत्व गर्न तयार हुने बताउनुभयो ।
उहाँले आजको बैठकमा माओवादीले सरकार परिवर्तनबारे प्रस्ताव ल्याएको बताए पनि अध्यक्ष खनाल र उपाध्यक्ष श्रेष्ठले भने यसबारे छलफल नभएको दाबी गर्नुभयो ।