संविधानको सामान्य खाकाबारे छलफल

काठमाडौं, २७ माघ (दैनिकी)

नयाँ संविधानको प्रारम्भिक मस्यौदाको खाका तयार पार्न गठन गरिएको उपसमितिले आज संवैधानिक समितिको बैठकमा प्रस्तावनासहितको खाकाबारे छलफल सुरु भएको छ ।
बिहान बसेको समितिको बैठकमा प्रस्तावनासहितको खाकाबारे छलफल सुरु भएको हो । ११ वटै विषयगत समितिले तयार पारेको मस्यौदा अध्ययन गरेर नयाँ संविधानमा कुन कुन विषय राख्ने भन्ने प्रस्तावनासहितको सामान्य खाका उपसमितिले तयार पारेको उपसमितिका सदस्य एकनाथ ढकालले बताउनुभएको छ ।
बैठकमा संविधानको एकीकृत मस्यौदाको खाका तयार पार्न गठन गरिएको उपसमितिले पुरै खाका बनाउनका लागि समय अपुग भएकाले एक हप्ताको समय माग गर्ने बताइएको छ ।
वर्षमान पुनको संयोजकत्वमा रहेको उपसमितिमा सपना मल्ल, रत्न शेरचन, एकनाथ ढकाल, गायत्री शाह, केशव मैनाली, सुनिल प्रजापति, डा. प्रकाशचन्द्र लोहनीलगायत सदस्य रहेका छन् ।
संविधानसभाको पूर्ण बैठकले दिएको सुझाव र निर्देशनका आधारमा संवैधानिक समितिले संविधानको मस्यौदा तयार गर्न सघाउनका लागि उपसमिति गठन गरेको हो ।