लिफ्ट खस्दा नेपाली खेलाडीहरु घाइते

आयोजकको गम्भीर लापरवाही
ढाका १५ माघ (दैनिकी)

११ औँ दक्षिण एसियाली खेलकुद सागमा भाग लिन गएका नेपाली खेलाडीहरु लिफ्ट खस्दा गम्भीर घाइते भएका छन् । पत्रकार सरिता श्रेष्ठका अनुसार ढाकाको इम्पेरियल होटलको चार तल्लाबाट लिफ्ट खस्दा जुडोका ५ र भारत्तोलनका २ खेलाडीहरु गम्भीर घाइते भएका हुन् ।
घाइतेमध्ये जुडो खेलाडी देबु थापा र कालुमान तामाङ्गको अवस्था गम्भीर छ । थापा यसअघिको संस्करणकी पदक विजेता हुन् । अन्य घाइतेहरुमा रमेश मगर राधादेवि राई,गाेपाल श्रेष्ठ र ज्ञान बहादुर श्रेष्ठ रहेका छन् भने एउटा खेलाडीकाे नाम खुल्न सकेकाे छैन ।
लिफ्ट खसेको लामो समयसम्म पनि साफ आयोजक बंगलादेशका खेल अधिकारीहरुले सम्पर्क नगरेको पत्रकार श्रेष्ठले जानकारी दिनुभयो ।
खाना खाने जाने क्रममा चौथो तल्लामै लिफ्ट अड्केर एकैचोटी चार तला तल खसेको थियो । अायाेजक पक्षले हाेटलकाे व्यवस्था गरेकाे नभएर नेपाली पक्षले गरेकाे थियाे ।
खेलाडीहरुलाई भर्खरैमात्र एम्बुलेन्समा हालेर उपचारका लागि लगिएकाले कसलाई कति चोट लागेको छ र नेपाली खेलाडिहरु खेल्न सक्ने अवस्थामा छन छैनन भन्ने विस्तृत जानकारी प्राप्त हुन सकेको छैन ।
जुडो नेपालले पदकको अपेक्षा गरेको प्रमुख खेल हो । ढाकबाट प्राप्त जानकारीअनुसार यो दुर्घटनापछि खेलाडिहरुको मनोबल खस्केको छ ।
बङ्गलादेशको ढाकामा शुक्रबार साँझ उद्घाटन हुने सागका प्रतियोगिताहरू भने शनिबारदेखि सुरु हुनेछन् ।

सार्क राष्ट्रअर्न्तर्गत आठ वटा देशहरूको सहभागिता रहेको प्रतियोगिताको साँझ औपचारिक रुपमा उदघाटन हुने बताइएको छ । उदघाटन समारोहमा तीन हजार खेलाडीहरूले आफ्नो प्रदर्शन देखाउने छन् । प्रतियोगितामा २३ वटा खेल समावेश गरिएको छ । साग खेल सन् १९८४ मा नेपालबाट सुरु भएको हो ।विभिन्न कारणले गर्दा केही वर्षसाग स्थगित भएको थियो । पाकिस्तानमा सम्पन्न नवौँ सँस्करणमा साफबाट यसको नाम साग राखिएको थियो । बङ्गलादेशको यो तेस्रो पटकको आयोजना हो ।
यसअघि सन् १९८५ मा पहिलोपटक आयोजना गरेको बङ्गलादेशले सन् १९९३ मा दोस्रो पटक आयोजना गर्‍यो । आयोजक बङ्गलादेशसहित नेपाल, भुटान, श्रीलङ्का, भारत, माल्दिभ्स्, पाकिस्तान र प्रतियोगितामा अफगानस्तानको सहभागिता रहेको छ ।
प्रतियोगितामा नेपालका दुइ सय ८३ खेलाडीले प्रतिस्पर्धा गर्ने भएका छन् । नेपाली खेलाडीहरू प्रतियोगिताका लागि बुधबार र बिहीबार नै ढाका पुगिसकेका छन् । नेपाली खेलाडीहरूको साथमा विभिन्न प्रशिक्षक तथा खेलकुद पत्रकारहरूको सहभागिता रहेको छ । प्रतियोगितामा एक सय ५० भन्दा बढि स्वर्णदकको लागि प्रतिस्पर्धा हुनेछ । त्यसमध्ये नेपालले एक सय ३२ स्वर्ण प्रतिस्पर्धा गर्ने बताइएको छ । आज भन्दा १० वर्षघि भएको सागमा नेपालले दोस्रो स्थान हासिल गरेको थियो ।
साग खेलकुदमा भारतको बर्चस्व रहँदै आएको छ । नेपालले पहिलो सँस्करणमा ४ स्वर्ण जितेकोको थियो भने दोस्रोमा एकमात्र स्वर्ण जितेको थियो ।तेस्रो सँस्करणमा आइपुग्दा नेपालले दुई स्वर्ण जितेको भने चौँथोमा एक स्वर्ण चित्त बुझायो । पाँचौ सागसम्म आइपुग्दा नेपालले दुईस्वर्ण हात पार्‍यो भने छैटौँ सागमा एक स्वर्ण जित्यो ।सातौँ सागमा चार स्वर्ण पदक जितेको नेपालले आठौँ सँस्करणमा आइपुग्दा नेपाल ३१ स्वर्ण पदक जित्न सफल रह्यो ।
नवौं सागमा सात स्वर्ण जतेको नेपालले दशौँ सागमा पनि सात स्वर्ण जित्यो ।